Somalia | News | Press releases | Jadeeco ayaa halis ku haysa kumannaan carruur Soomaaliyeed ah

Jadeeco ayaa halis ku haysa kumannaan carruur Soomaaliyeed ah

Print PDF

Muqdisho, Garoowe, Hargeysa, 10ka Juunyo 2014 – Jadeeco ka dillaacdey gobollada qaar ayaa sababtey in kumannaan carruur Soomaaliyeed ah ay halis u galaan naafannimo ama dhimasho haddii aan degdeg looga tallaalin cudurkan oo ah mid aad u faafa.

Bilihii Maarso iyo Abriil 2014ka waxaa la arkey in ka badan 1350 xaaladood oo jadeeco looga shakiyey – tiradan oo afar jeer ka badan tii la arkey isla muddadaan oo kale sanadkii hore waxaana bishii Maajo oo keliya la soo sheegey ku dhowaad 1000 xaaladood.

Si dhibaatada wax looga qabto, ayaa maamullada caafimaadka, oo taageero ka helaya UNICEF, WHO iyo la-hawlgalayaal kale, waxaa ay fuliyeen ololayaal tallaal oo baaxaddoodu kooban tahay waxaana ololayaal ballaaran ay bisha Juunyo ka fulin doonnaan degaannada ay sida ugu badan u saameysey ee gobollada Bari, Nugaal, Mudug, Banaadir iyo Jubbada Hoose iyaga oo beegsanaya carruur nus milyan ah oo shan sano jir ka yar.

‘Waxaa jira carruur Soomaaliyeed oo tiro badan oo ay nafaqo-xumo hayso,’ ayaa uu yiri Sikander Khan, oo ah Wakiilka UNICEF Somalia. ‘Carruurta nafaqo-xumadj hayso ayaa u nugul cudurrada – ayna u badan tahay in ay u dhintaan ama la silcaan naafanimo haysa inta noloshooda ka harsan sida indhoolenimo, dhegoolenimo ama dhaawac maskaxeed oo ay sababto jadeeco ku dhacda.’

Colaad labaatameeyo sano socotey ayaa burburisey waaxdii caafimaadka ee Soomaaliya, taas oo dalka ka dhigtey mid ka mid ah kuwa leh tilmaamayaasha caafimaadka iyo kuwa nafaqada ee ugu xun dunida oo dhan. Qiyaastii shantii carruur ahba mid ayaa dhinta ka hor inta uusan shan sano jirsan – iyada oo jadeecaduna ay tahay mid ka mid ah sababaha ugu waaweyn ee geeridooda.

‘Arrintan ayaa ah mid dhiillo weyn huwan. Hannaanka caafimaadka ee dalka ayaa ah mid aad u liita colaadda sanadaha socotey daraaddeed,’ ayaa uu yiri Dr. Ghulam Popal, oo ah Wakiilka WHO Somalia. ‘Waxaan ognahay in nisbo aad u hooseysa oo carruurta Soomaaliyeed ahi ay tallaallan yihiin waxaana u baahannahay in aan degdeg u tallaalno tirada ugu badan ee suuragal ah.’

Waxaa la qiyaasayaa in wax ka yar saddex-meelood meel carruurta Soomaaliyeed ee sanad jirka ah jadeecada looga tallaaley adeegyada tallaalka ee joogtada ah sanadkii 2013dii. Degaanno ku yaalla bartamaha iyo koonfurta Soomaaliya ayaa nabadgelyo-xumadu ay sababtey in saamiga carruurta la tallaaley uu aad u hooseeyo oo uu gaarayo ilaa 15%.

WHO iyo UNICEF ayaa sheegey in degdeg loogu baahan yahay ololayaal tallaal oo dalka oo dhan laga wada fuliyo si looga hortago in kumannaan ay dhintaan. Tani waxaa ay la halmaashaa in la tallaalo ilaa 5 milyan oo carruur iyo dhallin ay da’doodu u dhaxayso 9 bilood ilaa 15 sano ah iyada oo kharashka ku baxayana uu yahay qiyaastii US$9 milyan oo doolar.

WHO ayaa qiyaasaysa in marka ay jiraan xaaladaha degdegga ah sida kuwa Soomaaliya oo kale, ay 10% carruurta ay ku dhacdo jadeecada ay u dhiman karaan dhibaatooyin uu cudurku ku keeno.

Read the press release in English

Macluumaad dheeri ah, fadlan kala soo xiriir:
UNICEF: Susannah Price
+254 722 719867
This e-mail address is being protected from spambots. You need JavaScript enabled to view it

WHO: Raffaella Vicentini
+254 716 215170
This e-mail address is being protected from spambots. You need JavaScript enabled to view it

Key health-related statistics

Total population (000s)12 316
Maternal mortality ratio (per 100 000 live births) 732
Total life expectancy at birth (years) 55.4

Source: Framework for health information systems and core indicators for monitoring health situation and health system performance, 2018

See Somalia country profile

Regional Health Observatory

Contact us

WHO Representative
WHO Liaison Office for Somalia in Nairobi
PO Box 63565
Nairobi